CHA ye un coleutibo de ombres y mullers que asumen como d´ers as balguas propias de o sozialismo democratico, y que se consideran parti de o esfuerzo istorico en a rechira de a libertá, a democrazia, a toleranzia en a pluralidá, a paz, a dinidá, a solidaridá y a igualdá entre as presonas y os pueblos, fuindo de domatismos y replegando de as diferens esperienzias de o mobimiento sozialista, de os mobimientos por a emanzipazión sozial y nazional, y de as corriens ecopazifistas y umanistas, os elementos alazetals ta la definizión de a suya estratexia y o suyo pograma.
(Articlo 1. Ordinazions de CHA).
CHA naxe o 29 de chunio de 1986 con a ideya d´estar o berdadero pellán de l´aragonesismo de cuchas, un partito politico ereu de las organizazions aragonesas que, dende 1919, se achuntaron en a emigrazión con os nombres de "Unión Aragonesista" y "Estado Aragonés"; un partíto d´uey con un moderno proyeuto ta o nuestro País.
A dato de o nuestro natalizio como partiu no ye casual pus ye o cabo d´año de os "Decretos de Nueva Planta" que remataron definitibamen con os dreitos y libertaz de o nuestro pueblo. Dimpués de o referendum de a OTAN, una colla de presonas compromesas con Aragón y a cucha, prozedens de os mobimientos sozials, culturals y ecoloxistas, fundoron un proyeuto sozialista suyizo ta iste territorio: Chunta Aragonesista. Nos definimos como nazionalistas de cuchas y rebindicamos os dreitos y libertaz de o pueblo aragonés dende una güellada progresista.
Dende ixe diya lexano, CHA ye trayendo aires nuebos ta la soziedá aragonesa, con nuebas ilusions, con nuebas manieras de fer politica, con a boluntá d´estar o berdadero referén de a etica y a dinidá, con o compromis por a esfensa y o desembolique de os dreitos de os aragoneses y as aragonesas, con un compromiso sinzero con a suya soberanía. CHA quiere adrezarse y ganar a confitanza de ixa zidadanía de esmo progresista que suposa a mayoría sozial aragonesa. Emos naxito ta influyir dezisibamen en a bida politica aragonesa, emos crexiu ta trasformar as oportunidaz de esdebenidero de iste País. A nuestra istoria así o fa creyer. A primera enchaquia eleutoral de CHA estié en 1987, dimpués de zelebrarse l´añada anterior en Zaragoza a Primera Asambleya Nazional. Dezaga de a Segunda Asambleya Nazional ( Uesca,1988)) concurriemos a la nuestra segunda zita eleutoral conseguindo un diputato en o Parlamento Europeyo en a coalizión "Izquierda de los Pueblos". As elezions munizipals y autonomicas de 1991 nos atorgaron representazión en Teruel, Chaca, Tarazona, Balbastro y L´Almunia y metieron en as nuestras mans, por primer begada, a mayoría de un conzello: o emblematico lugar d´Artieda.
L´añada 1992 ye eszenario de barios acontezimientos alazetals en a
istoria de CHA: as mobilizazions por o pleno autogobierno y contra
l´amenaza de os trescoles, tanto en Madrí como en Zaragoza, tenieron una
repercusión alazetal en a toma de conzienzia de a nezesidá de un
proyeuto nazionalista suyizo ta Aragón. En 1995 se produze de forma
cheneralizada a entrada de Chunta Aragonesista en as istituzions
aragonesas: Cortes de Aragón, Conzellos de Zaragoza o Uesca entre otros
dica un total de 20. Dende allora, a istituzión que cubilla la soberanía
de iste territorio ha una atra boz que se´n ha dixato notar en as
trasferenzias de l´amostranza, en o Pauto de l´Augua, en as autuazions
tendens a estruturar y equilibrar o nuestro territorio... En as elezions
chenerals de 1996 teniemos 50.000 botos que estieron a punto de lebar a
José Antonio Labordeta, como capeza de lista de CHA, a las Cortes de
Madrí.
En a V Asambleya Nazional ( Uesca, chinero de 1998), CHA se consolida como un partito plural que integra as diferens sensibilidaz de qui asperan a un camio sozial alazetato en a libertá, o sozialismo y l´autogobierno. O nuestro ochetibo zaguero: articular dende a cucha o nazionalismo de amplia base sozial que Aragón menesta. Ta to ixo, y debán o triple reto eleutoral de chunio de 1999, a CHA li cal l´esfuerzo, triballo, ideyas e ilusión de todas ixas presonas que se beigan clamadas a partizipar en iste proyeuto.
Inicio
página
